葉劍英元帥長子、全國政協原副主席、廣東省前省長葉選平尋日喺廣州逝世，享年95歲。葉選平响80年代初開始喺廣東任職，一做就做咗11年，先後做過廣東省副省長、廣州市市長、廣東省省長，係廣東改革開放一位重要嘅見證者、參與者。改革開放其中一個重要項目，係大亞灣核電站嘅規劃同建設，當中都可以搵得到葉選平嘅身影同努力。總結當年推動廣東改革開放嘅經驗，葉選平認為要「認認真真做貓，把老鼠逮住！」可以話係一個實幹派。

葉選平1924年响廣東梅縣出世，1941年深知工業重要性嘅葉劍英，安排咗葉選平去延安自然科學院機械系讀書。新中國成立之後，葉選平先後喺哈爾濱工業大學同清華大學短期學習，又去過蘇聯實習。慢慢佢由一位基層普通幹部，做到機械廠副廠長同總工程師等要職。1973年至1977年期間，出任北京市機械局領導小組副組長、黨委常委，之後响1978年至1980年出任國家科委三局局長。

1980年正值改革開放初期，葉選平南下廣東出任副省長兼省科委主任，1983年任廣州市委副書記、市長，1985年升任廣東省省長。葉選平可以話係改革開放初期廣東省嘅主要領導，喺廣東工作嘅呢段時間，被譽為廣東改革開放嘅「闖將」。喺廣東辛勤工作11年，令佢得到「實幹家」稱號。

改革開放時期，中國缺乏籌建大型核電站經驗，一班專家對於廣東係咪興建核電站、經營方式、用邊種反應堆型、發電機組嘅裝機容量等問題上各有意見，無法達成一致。當時葉選平聽取各方意見，親自研究各種技術資料，經過測算、對比分析後，取長補短，為耗資四十多億美元興建嘅核電站細節拍板定案。建築物嘅問題告一段落，又衍生出人選嘅問題——究竟邊個夠班擔任呢座重要設施嘅總經理？話說當時有人反對由外面嘅人選擔任，不過主管呢項工程嘅葉選平就用人唯才，講明「誰有經驗有能力就讓誰當！」盡顯魄力同眼界。

葉選平1991年卸任廣東省省長，之後接受傳媒訪問時提到自己有所不足，話當時唔夠重視環境保護，為咗將先將經濟搞起，不知不覺付出沉重嘅環境同資源代價，為後任省長留下唔少難題。敢於面對自己嘅不足，試問又有幾多人做得到？

原圖取自網絡。