諾貝爾物理學獎得主、香港中文大學前校長高錕於去年今日逝世，終年84歲。有「光纖之父」之稱嘅高錕早喺60年代就已經提出光纖理論，但當時佢嘅理論未有得到認同，更有唔少媒體笑佢「癡人說夢」，但佢堅持繼續研究同改良技術，最終喺1981年發明咗第一代嘅光纖系統，深深影響日後通訊科技嘅發展，亦令人類嘅通訊更加方便。雖然光纖嘅發明大大改變人類嘅生活，但要去到2009年高錕確診患腦退化症之後，佢先至獲頒諾貝爾物理學獎，表揚佢喺光學通訊方面具開拓性嘅成就。

自從高錕响2002年確診患上腦退化症，佢嘅記憶力就開始逐漸衰退，甚至喺獲頒諾貝爾獎嘅時候，連自己發明嘅光纖都已經忘記得一乾二淨，不過佢始終都無忘記到一位重要人物——太太黃美芸。同其他病患者家屬一樣，黃美芸初初都經歷過唔開心、辛苦同氣餒嘅階段，不過高太只要諗起以前同丈夫嘅甜蜜時光，就會願意一直照顧丈夫，無論順境逆境、健康或疾病，佢依然對高錕不離不棄。

圖片為高錕接受諾貝爾獎，取自網絡。