上次介紹完Do姐鄭裕玲同發哥周潤發喺1970年代拍咗《網中人》呢套經典劇集,今次就再介紹多套Do姐經典作品——1990年嘅《表姐,你好嘢!》。Do姐之後憑住《表姐,你好嘢!》呢部電影,贏得第10屆香港電影金像獎最佳女主角獎項,撼贏《廟街皇后》嘅張艾嘉、《秦俑》嘅鞏俐、《阿飛正傳》嘅劉嘉玲同《愛在別鄉的季節》嘅張曼玉共四位強手,成為影后。

套戲可以話係90年代一部經典喜劇,喺戲入面,Do姐飾演一位內地女幹部鄭碩男,佢同飾演助手阿勝嘅張堅庭負責押解一個毒販嚟香港,並且由梁家輝飾演嘅香港總督察伍衛國負責接待。但點知個毒販走甩咗,於是佢哋就合作追捕,期間鬧出唔少笑話。演員林蛟喺戲入面飾演梁家輝個爸爸,個角色本身係國民黨舊部,同Do姐成日有衝突,場面搞笑。

圖為劇照,取自網絡。