有「領呔大王」之稱嘅金利來集團創辦人曾憲梓，上個禮拜五喺家鄉梅州逝世，終年85歲，阿史今日就介紹吓佢嘅事跡。曾憲梓1934年生於廣東梅州市一個農民家庭，細個嗰陣喪父，1961年喺廣州中山大學畢業，之後去泰國發展同學習剪裁領呔技術。佢1968年嚟到香港創業，以六千蚊起家，透過家庭工作坊方式生產領呔。佢提過當時每日瞓得4個鐘，「每日如果賣唔出五打領帶，就唔可以返屋企」，因為賣唔到就無辦法維持一家六口第二日嘅生活。去到 1971年，金利來正式成立，其後公司產品擴展至皮具同男士飾物等等，逐漸喺香港打響名堂。

响同一年，中國乒乓球代表團應邀嚟香港舉行表演賽，曾憲梓以金利來名義贊助電視台轉播。對於仲喺發展初期嘅品牌嚟講，三萬元嘅電視廣告費要分期找數。不過呢一步為金利來帶嚟意想不到嘅商業效果，金利來藉住乒乓球隊嘅精彩表演成功入屋，領呔嘅銷量迅速大增，之後嘅生意愈做愈大。

幾年之後，內地改革開放，中央政府鼓勵華商到內地投資，曾憲梓就响1983年喺內地投資設廠。受惠於相關政策，金利來迅速發展，而曾憲梓亦開始投放心力喺慈善同公職上。從上世紀70年代尾開始，佢多年嚟响家鄉梅州捐款興建多間學校，包括梅縣麗群小學、梅州市曾憲梓中學等等，連同航天、體育、科技同醫療等唔同範疇嘅捐款，合共捐款超過1400次、累計超過12億港元。為咗表揚佢嘅貢獻，中科院紫金山天文台响1994年將一顆小行星命名為「曾憲梓星」。

公職方面，佢喺1991年當選港區人大代表，1994年起當選為第8、9、10屆全國人大常委，香港回歸前做過香港基本法諮詢委員會委員、港事顧問同特區籌備委員會委員，為香港回歸作出貢獻。喺1997年，佢成為首批獲頒授大紫荊勳章嘅人士之一。

圖為曾憲梓，取自網絡。