著名歷史事件西安事變嘅主角，除咗少帥張學良、蔣介石之外，仲有國民黨第十七路軍總指揮嘅楊虎城。喺1936年12月，楊虎城聯同張學良發動西安事變，兵諫國民政府軍事委員會委員長蔣介石，迫使佢同中共合作抗日，最後張學良親自護送蔣介石返南京，不過張學良同楊虎城嘅下場可以話係大相逕庭。喺1949年9月，楊虎城同家人喺重慶被秘密殺害，終年56歲。

西安事變之後，張學良被軟禁超過半世紀，去到90年代先至獲釋，最後响2001年病逝，享年100歲。至於楊虎城，佢响西安事變後流亡海外，後嚟回國並遭監禁，直至1949年新中國成立之前，蔣介石下令殺死佢。喺1949年9月，國民黨特務以轉押楊虎城同家人去台灣為由，將佢哋押送到重慶嘅戴公祠，楊虎城同佢嘅仔女、秘書宋綺雲一家、副官閻繼明、部下張醒民，一共8人被特務殺死。根據西安事變研究會秘書長李建文表示，楊虎城死後更被人淋鏹水毀容。

圖片為楊虎城，取自網絡。