早排同小學同學出嚟聚會，其中一個人提到有個好耐無聯絡嘅同學喺FB post咗張結婚相出嚟，仲俾阿史睇埋相。呢位同學一開口就話個新娘外形麻麻地，不過講真，娶老婆梗係唔係齋睇樣喇，好似三國有名謀士諸葛亮嘅老婆黃月英就係一個好例子，雖然其貌不揚，但就才德兼備。

黃月英又名黃婉貞、黃碩，相傳佢生得唔多好睇，黃頭髮、黑皮膚，但就飽讀兵書、上知天文、下知地理，可以話係女版諸葛亮。究竟諸葛亮同黃月英點樣識嘅呢？根據《三國志》引《襄陽記》話，當初係黃月英爸爸黃承彥主動向諸葛亮推銷自己個女嘅。黃承彥係沔南名士，聽聞諸葛亮要娶老婆，就推薦自己屋企個「黃頭黑色」、「才堪相配」嘅「醜女」俾諸葛亮。

諸葛亮當堂就應承咗，一嚟可能想借助黃承彥嘅名氣、地位為自己嘅事業鋪路，二嚟亦可能係因為黃月英嘅才智。無論點都好，兩人後嚟成親，有時人以此為樂，仲作咗句：「莫作孔明擇婦，正得阿承醜女。」講講吓，傳傳吓，黃月英就成為大家口中嘅「醜女」代名詞。

圖為《回到三國》劇照同黃月英遊戲卡形象，原圖嚟自網絡。