1982年9月24日,英國前首相戴卓爾夫人响北京人民大會堂門口嘅「世紀一仆」,令唔少香港市民隔咗37年依然對嗰幕記憶猶新。佢仆親嘅經過相信各位史友都好熟悉,今日一於同大家介紹吓佢當年仆親之前開嘅嗰個會,到底發生咗咩事。話說當年戴卓爾訪問中國,就香港嘅前途問題同中國領導人會面,喺佢訪京之前,香港一班政商界人士向佢建議英國保留香港嘅管治權,當時「主權換治權」就成為英方嘅共識。但戴卓爾夫人抵達北京之後,好快就發覺呢個如意算盤打唔響。

其實响訪問北京之前,英國响阿根廷手上奪回福克蘭群島,令戴卓爾夫人民望飆升。當年9月佢第一次訪華,係24日會晤時任國家領導人鄧小平。戲肉嚟喇,當時戴卓爾借勢要求中國承認清政府割讓香港及九龍半島畀英國嘅條約,即係《南京條約》、《北京條約》同埋《展拓香港界址專條》繼續「有效」,又提出以主權換治權,結果被鄧小平一口拒絕。鄧小平當時講到明,「主權問題是不能夠談判的,就是中國1997年收回香港的問題是不能談判的。」鄧小平仲警告,如果香港响未來十五年發生大規模同嚴重嘅動亂,解放軍會提前响九七年前進駐。

傾完之後,戴卓爾意識到中方立場比想像中強硬。有講法話佢當時係諗緊點應對,先至會响落樓梯嘅時候叉錯腳,亦有外國媒體話佢係因為靜脈曲張先搞到跌親,可見各方就對佢嘅「世紀一仆」有無限解讀。大家又點睇?

圖為戴卓爾夫人與鄧小平會面、戴卓爾跌倒,取自網絡。