美心集團近日受到大眾熱切關注，其實美心集團旗下嘅食店真係多到數唔晒，除咗以「美心」命名嘅西餅店、快餐店、酒樓之外，仲有好多餐飲品牌都係由美心集團經營，日本菜有千両、元氣壽司、丼丼屋、一風堂，西餅咖啡就有東海堂同Starbucks。集團今時今日喺香港、澳門、內地，以及多個亞洲地方合共擁有超過1300間分店，規模相當大，今日就同大家介紹吓美心嘅歷史。

美心集團創辦人係伍舜德同伍沾德兩兄弟，佢哋响1956年創辦第一間美心餐廳，但原來呢間餐廳嘅創辦係同種族歧視有關嘅。話說當年香港華人嘅地位不及西方人士，伍舜德同伍沾德兩兄弟去到間西餐廳食飯嘅時候，經常被安排喺廁所附近嘅位置，個洋人經理話，因為華人唔飲酒、消費力低，所以招呼就差啲。伍舜德同伍沾德兩兄弟好唔忿氣，為咗證明華人配得上西餐廳，於是就喺中環連卡佛大廈開設美心餐廳，請嚟法國廚師同樂隊現場伴奏，吸引唔少社會名流幫襯。

上咗軌道之後，美心就開始涉獵唔同飲食文化，美心1971年喺星光行開設咗美心首間中菜食府翠園，1972年旗下首間快餐店亦都正式開幕。响1972年，美心獲怡和集團嘅置地公司入股，成為股東，1986年亦同牛奶公司成為合作夥伴，進一步拓展飲食王國。

圖片為美心皇宮，取自網絡。