漢字嘅發展史源遠流長，好多字我哋都見過但唔識讀，又或者連見都未見過。近排有個老友專登走嚟問阿史「犇羴猋鱻掱」點讀、點解，阿史見呢幾個字嘅組合好得意，就順便同大家分享吓。

「犇羴猋鱻掱」呢幾個字每字單獨拆開就人人都識，但多咗兩隻就完全唔同解法。好似呢個「犇」咁，佢同牛無乜關係，係「奔」嘅古字嚟。「猋」同「鱻」分別係「飆」同「鮮」字，「猋」嘅意思係速度好快或者犬嘅奔跑狀。至於「羴」讀做「山」，今次就關羊事喇，皆因佢係「膻」（羊臊味）嘅異體字，又可以解做一群羊。最後就係「掱」，佢讀「扒」，「掱手」同「扒手」一樣意思。人有兩隻手就好平常，多咗嗰隻手就係指扒手、小偷咁解。寫完段文，秘書妹妹忍唔住响後面講咗句，「好難呀！」

原圖嚟自網絡。