浩瀚星空，蘊藏無窮嘅未知。為揭開宇宙謎團、探索未知領域，神舟七號喺2008年9月25日夜晚9點10分升空，43個鐘頭之後，即係27日下晝4點幾，航天員翟志剛出艙執行任務，成為首位於太空漫步嘅中國航天員，亦令中國繼前蘇聯同美國之後，成為第三個擁有出艙技術嘅國家，阿史記得當年電視都有做直播㗎。

當時翟志剛踏出艙之後向鏡頭揮手，表示感覺良好，仲向全國人民同全世界人民問好，又揮舞國旗。唔講唔知，期間有段小插曲，話說佢出艙之後，地面人員話儀表顯示真空嘅軌道艙出現火災警報，同翟志剛一齊執行航天任務嘅劉伯明即刻檢查，發現根本無火災。後嚟佢哋搵到「兇手」——感煙探測器。原來探測器响真空環境下壞機，搞到傳感器發出高電頻訊號，顯示為火警，擺咗個大烏龍。唔少人認為，真空嘅軌道艙無氧氣，所以唔可能發生火警。

講返翟志剛，佢完成實驗任務之後就返回艙內，歷時大約半個鐘。根據當局嘅計算，原來呢半個鐘裡面，翟志剛足足喺太空「行」咗9165公里。

原圖取自網絡。