好多人屋企依然仲有用日曆嘅習慣，不過一年要換一次其實都幾唔環保，唔知大家有無聽過萬年日曆？即係用一本日曆就可以查到差唔多成萬年嘅日子，佢嘅發明者就係有「東方愛因斯坦」之稱嘅鄭振秀。

鄭振秀係江門恩平人，出身於貧苦僑工家庭，之後被父親接去加拿大打工謀生。鄭振秀喺加拿大嘅華僑社團度接觸咗唔少華人，了解到好多華僑每年都要托人喺國內買本「通書」返去查日子，但「通書」嘅使用比較麻煩，好多人都想有本簡單方便嘅通書嚟代替舊式曆法通書。鄭振秀於是開始埋頭鑽研，但佢讀書唔多，學識有限，唯有日頭返工，夜晚自學數學、天文學、曆法等知識。

20年過去，鄭振秀終於發明咗一本可以由公元前1年至公元9999年都用得嘅萬年日曆。佢嘅外形似個鏡架，如果要搵任何一年嘅其中一日，只要轉動日曆，就可以好快知呢日係星期幾，認真方便。呢個萬年日曆之後得到加拿大政府50年嘅專利權，美國亦給予25年專利權，引起美、加新聞界爭相報道，曾經有文革話媒體稱佢為「東方愛恩斯坦」。鄭振秀本嚟諗住向中國、日本同歐洲各國申請專利，只不過撞正抗日戰爭、第二次世界大戰相繼爆發，呢個計劃只好擱置。1948年，鄭振秀喺溫哥華因病逝世，到最後，萬年日曆都只係可以喺外地少量發行，無辦法喺全世界推廣。

圖為鄭振秀同萬年曆模擬團，原圖嚟自網絡。