中國人從嚟都好避忌講「死」，仲在生嘅時候寫定挽聯更加係大忌，有詛咒人嘅意味。「晚清四大名臣」之一嘅曾國藩，就因為幫在生嘅朋友湯鵬寫咗副輓聯，搞到兩個人無fd做，從此老死不相往來。咁點解曾國藩無啦啦要幫朋友寫副輓聯？原因係佢練文筆已經練到無嘢好寫，個答案認真令人O嘴。

講起湯鵬，大家可能都唔知係邊個，多得曾國藩，後世對湯鵬先多咗幾分了解。曾國藩曾經讚佢「才氣奔放」，兩人嘅一段友誼亦令湯鵬聲名大增。話說曾國藩鍾意寫文章，每日都堅持練筆，更加將寫輓聯當做練筆手段之一。佢唔單止幫過身嘅人寫輓聯，仲居然自把自為，偷偷幫在生嘅朋友寫輓聯，真係大吉利市！

據清代李伯元嘅《南亭筆記》記載，有一年元旦，湯鵬去曾國藩屋企拜年，無意中發現硯下面壓住一張紙，想話拎出嚟睇，曾國藩打死唔肯。咁樣一嚟更激起湯鵬嘅好奇心，硬係搶咗過嚟睇，唔睇由自何，一睇嬲到震，原嚟張紙寫嘅內容係湯鵬人生總結，正正係佢嘅挽聯！湯鵬激到拂袖而去，自此同曾國藩絕交。雖然後來曾國藩再三道歉，湯鵬都係唔理佢。結果直至湯鵬過身，兩人都無再重修舊好。 

不過，據曾國藩為湯鵬寫嘅祭文就話二人絕交同寫挽聯無直接關係，而係因為某年曾國藩完成四川鄉試正考官嘅任務返京城之後，湯鵬特登設飯局為佢洗塵，點知唔知因咩事兩人一言不合就嘈起上嚟，搞到第二年湯鵬逝世，兩人都無再見面，曾國藩對此亦非常內疚。

原圖嚟自網絡。