上個禮拜同大家講過諸葛亮夫人黃月英其貌不揚，但就有才德搭夠，今個禮拜再講多個關於醜女嫁名士嘅故仔，佢就係三國時代名士許允嘅妻子阮氏，佢喺新婚夜當晚全靠食腦，成功收服丈夫。

筆記小說《世說新語》曾記載過，喺魏明帝（曹丕個仔）時期，有個名士叫許允，佢嘅新婚妻子係西晉作家阮德如嘅妹妹，不過阮氏生得「奇醜」，所以許允同新娘子拜完堂之後就無再理阮氏。啱啱好有客人嚟拜訪許允，阮氏個婢女一打聽，知道係有「智囊」之稱嘅桓範到訪，阮氏即刻放心話：桓範嚟咗，就一定會勸許允入嚟。果然，桓範真係嚟勸許允嘅，佢話：「既然阮家肯嫁個女俾你，就一定有道理，你不妨入去睇定啲先。」

許允果然聽勸，入去睇睇新娘，一見到新娘，就嚇到想即刻返出去。阮氏知道佢一走就唔會再返嚟，馬上拉住佢嘅衣襟唔俾佢走。許允見老婆咁唔莊重，有啲嬲嬲地，唯有同佢講：「婦女應該具備四種美德，你有幾多種？」阮氏答話：「我只係無美貌，然而士人都應該有好多種良好德行，你又有幾多種？」許允好自豪咁話佢都有齊，點知反而被阮氏用一句就KO咗，唔單止令許允慚愧，仲令許允從此以後非常敬重女方。呢句話就係：「夫百行以德為首，君好色不好德，何謂皆備？」意思係話，士人咁多種德行之中，以德為首要，但你就愛好美色唔注重德，又點可以話你具備晒咁多種德行呢？一句就令許允唔敢以貌取人，仲對阮氏相敬如賓，都咪話阮氏唔犀利。

原圖嚟自網絡。