前布政司鍾逸傑前日逝世，終年92歲。鍾逸傑喺50年代加入港英政府，曾出任多個重要職位。佢1985年出任布政司，第二年時任港督尤德爵士訪問北京期間病逝，鍾逸傑擔任署理港督，直至衛奕信來港接任。鍾逸傑喺1987年退休，之後一直留喺香港生活，90年代中國政府委任鍾逸傑為港事顧問、首屆行政長官推選委員會委員。佢嘅人生道路，响香港留下唔少足跡同貢獻。

喺30年嘅公務員生涯裡面，鍾逸傑超過三分之二時間都係响新界工作。佢先後喺荃灣、離島、元朗等地區出任理民官，去到1974年出任新界政務司，協助時任港督麥理浩發展新市鎮、推行「十年建屋計劃」，主理興建沙田新市鎮。响七十年代，佢仲參與過大埔、屯門等多個新市鎮發展，因而有「新市鎮之父」稱號。四年後，佢獲委任為行政局議員，1981年調任政務司，主理全港地區行政，任內試行代議政制，舉行咗第一屆區議會選舉，直至1985年轉任布政司。

鍾逸傑同中國政府嘅友好關係，可以話係由1973年開始，當時佢係新界民政署署長，喺足球總會主席霍英東嘅穿針引線下，佢以足總副主席身份訪問內地，成為首位訪問內地嘅港英政府官員。回歸之後，鍾逸傑創辦「同心同根萬里行」，為青年提供到內地交流嘅機會，佢又創辦「無止橋」項目，鼓勵香港同內地嘅大學生為國內窮困同偏遠農村修建設施，培養佢哋對社會嘅熱誠同承擔。2012年鍾逸傑支持梁振英參選特首，更出任對方嘅參選顧問。去到2017年特首選舉，梁振英放棄競逐連任，鍾逸傑就支持新民黨主席葉劉淑儀參選。

圖為鍾逸傑，取自網絡。