歷史上記載嘅神童唔少，但好似生於晚清、被譽為民國第一神童嘅江希張咁，足跡遍佈地球六大洲，又得名人賞識嘅就唔多見。出生喺山東濟南嘅江希張，自幼被父母發現佢天賦異稟，於是更加用心栽培，所以江希張3歲就認到800幾個字、4歲識寫詩文，童年時期就已經研讀咗四書五經等儒家經典。唔單止咁，江希張後嚟被康有為收做弟子，仲曾經差啲做埋末代皇帝溥儀嘅伴讀添。

江希張幾歲人仔就立志要「為天地立心，為生民立命，為往聖繼絕學，為萬世開太平」，咁啱嗰陣溥儀差一個伴讀，於是有人輾轉將江希張推薦入宮。江希張輕易通過面試，本嚟攝政王都批准江希張擔任伴讀，不過當時正值革命，晚清政權不穩，大家都無暇顧及伴讀嘅事。隔咗一排，滿清被推翻，江希張自然就同皇帝伴讀一職失諸交臂。

嚟到民國，江希張嘅聲名依然響亮，先係出版著作《四書白話解說》，又得北洋政府代理大總統馮國璋召見，聘請佢擔任公府諮議，而嗰陣江希張只係得10歲。跟住，江希張相繼發表咗《孔子發微》、《道德經白話解說》等書，得到清代維新變法發起人康有為賞識，收為弟子。之後，江希張去咗法國留學、喺澳洲工作過、去過南非謀生等，地球六大洲都有佢嘅足印。但最後，江希張都係返咗中國，為科研、翻譯等範疇做貢獻。

圖為江希張同溥儀，原圖嚟自網絡。