阿史有個朋友係「狗奴才」，錫狗狗錫到燶，當正佢哋係主子，平時出街都推BB車俾主子做座駕，又用靚肉、貴狗糧供奉，令狗狗嘅生活分分鐘好過唔少人。唔講唔知，歷史上出名心狠手辣嘅慈禧太后都對狗狗好好，好食好住供養佢哋之餘，仲有專人服侍。呢啲狗狗當中，慈禧最鍾意嘅係一隻叫做「海龍」嘅狗狗，每次出宮都會帶住佢，所以狗狗又有個僅次於慈禧嘅稱號——「隨駕大臣」。

慈禧養嘅狗狗叫「御犬」，連住嘅地方都與眾不同——專門豪宅「御犬廄」，御犬廄可以話係迷你版宮殿，材料全部用竹片製成，夠晒奢華精緻。唔單止咁，御犬有4個太監專門伺候，負責狗主子嘅飲食、調教、修飾等。御犬每日嘅大餐包括牛羊鹿肉，飲嘅係雞鴨魚湯，伙食不知好過幾多人。另外，每隻狗狗除咗好食好住之外，仲有糧出添，真係羡慕死人。

慈禧鍾意玩狗，而狗狗去見慈禧、同慈禧gathering之前，需要沐浴更衣兼噴埋香水，夠曬大陣仗。不過一旦狗狗唔聽話，違背慈禧嘅旨意，慈禧又會毫不猶豫咁殺咗隻狗，事後追悔莫及就遷怒於太監，認真喜怒無常。

圖為慈禧同狗狗合照，原圖嚟自網絡。