今日係10月10日雙十節，除咗紀念武昌起義，1945年今日亦都係國民黨同共產黨簽署《雙十協定》嘅日子。話說响1945年8月，日本喺二戰中投降之後，國民政府委員會主席蔣介石先後三次邀請共產黨中央委員會主席毛澤東去重慶談判。8月底，毛澤東率團抵達重慶，國共代表响29日展開談判，到咗9月4日談判進入實質性階段，雙方就軍隊同解放區問題展開激烈討論。最後，雙方代表喺10月10日簽署《政府與中共代表會談紀要》，亦即係《雙十協定》，闡述雙方喺和平建國基本方針、政治民主化、國民大會、黨派合作、軍隊國家化、解放區地方政府等問題上嘅見解，有部分取得共識，包括以和平、民主、團結、統一為基礎建設新中國等等，但喺軍隊同解放區問題上，仍然陷入分歧。

兩黨簽署協議，代表响政治上相互承認，仲釋出繼續協商嘅意願，不過實際上，呢份協議對解決問題嘅實質作用有限，兩黨其實各有打算，好似响重慶談判同「雙十協定」前後，雙方衝突根本並未止息。

圖為毛澤東同蔣介石喺重慶談判期間合照。