日本經典漫畫《麵包超人》作者柳瀨嵩喺6年前逝世，享年94歲。柳瀨嵩喺1973年創作咗麵包超人呢個角色，只要有人遇到困難，佢就會挺身而出幫忙，如果有人覺得肚餓，麵包超人仲會搣自己塊面（一嚿包）出嚟同人分享。唔講唔知，其實麵包超人嘅創作理念，原來係同柳瀨嵩參加過二戰呢段經歷有關。

柳瀨嵩早年畢業於工藝設計學校，二戰嘅時候從軍負責文宣工作，期間感受到戰爭帶來嘅痛苦同飢餓，認為填飽個肚先係首要重任。喺1969年，柳瀨嵩創作出一個圓臉男人分麵包俾飢餓小朋友嘅故事，刊登喺童話繪本《十二顆珍珠》入面。1973年柳瀨嵩就將呢個概念塑造成頭部由紅豆麵包組成嘅麵包超人，繼續幫助飢餓嘅人。

《麵包超人》喺《幼兒童話繪本》刊出之後大受歡迎，1988年開始喺日本電視台聯播網播放動畫版。到咗2009年，《麵包超人》以1768個角色，打破《健力士世界紀錄》，成為最多登場人物嘅動畫。

圖為柳瀨嵩，取自網絡。