視帝黎耀祥好戲就大家都知,除咗電視劇,佢仲拍過唔少電影,好似喺1997年電影《愛你愛到殺死你》入面,佢飾演一名變態歌迷,演到七情上面、入型入格,令觀眾留下深刻印象。

《愛你愛到殺死你》由王晶監製、李力持執導,內容係將荷里活賣座片《護花傾情》(奇雲高士拿同雲妮侯斯頓主演)改頭換面。鄭秀文飾演歌手朱金梅,故事講述佢不時收到恐嚇信,令經理人非常緊張,於是警方就派出由黎明飾演嘅警員黎樹根做朱金梅嘅保姆,負責保護朱金梅同調查案件。而黎耀祥就飾演變態歌迷,戲入面有一幕就係黎耀祥整理緊偶像海報,點知隻貓整爛咗,結果佢就發晒癲咁殺死隻貓,夠晒恐怖。

另外套戲嘅主題曲同插曲,包括黎明嘅《DNA出錯》、鄭秀文嘅《我們的主題曲》同《最後一次》等等,亦都非常經典,搞到阿史好想大聲唱返句:Oh! La La La La La La 我的歌~

圖為劇照,取自網絡。