上次講起黃大仙竹園村嘅歷史,咁之後點解會變晒公屋嘅呢?話說喺第二次世界大戰之後,香港嘅工業發展蓬勃,竹園村一帶出現唔少小型工廠,另一方面黃大仙祠嘅發展亦令該區熱鬧起嚟。但到咗1957年,港英政府宣布收回竹園村大批土地,進行市區重建,興建徒置區。當年港英政府呢個決定引起竹園村居民以及九龍其他受收地威脅嘅村民反對,佢哋爭取各界支持,阻止遷拆竹園村,當時中國政府都有出面反對,但仍然阻唔到港英政府嘅遷拆行動。

喺1957年3月11日,衙前圍村、沙埔村、牛池灣村、大磡村、元嶺村、沙地園村、坪頂村、坪石村、牛頭角村,以及竹園村,組成「九龍十鄉聯合支援竹園村民會」。一個月後,茶果嶺村、鯉魚門村同茜草灣村亦都加入,變成「九龍十三鄉聯合支援竹園村民會」,要求停止遷拆竹園村,或爭取較佳賠償。

喺港英政府拒絕停止清拆之後,九龍十三鄉聯合支援竹園村民會向輔政司、華民政務司、新界鄉議局、中華總商會,以及官商名流同華人代表尋求支持,其中得到左派農會組織「僑港種植總公會」嘅積極回應,後來中國外交部亦向英國發照會表示抗議,批評港英政府遷拆村民房屋同田園,嚴重破壞中國居民傳統權利,威脅正常生活,造成巨大財產損失。但最終都係阻止唔到港英政府嘅拆遷計劃,大部分竹園村都喺1957年底被清拆,興建徒置區。

圖為黃大仙竹園鄉,取自網絡。