生於皇室，到底係幸定係不幸？學史友之前話齋，要睇係咩時代。末代皇帝溥儀自兩歲幾登基為帝，唔夠三年辛亥革命爆發，令清朝268年統治、兩千年來嘅封建帝制，正式畫下句點。而溥儀呢為紫禁城最後一個主人，先後走過張勳復辟、偽滿洲國成立、淪為戰犯等歷史足跡，最後於1967年嘅今日逝世，多次成為影視題材嘅傳奇人生，終歸落下帷幕。

溥儀自傳《我的前半生》記載，登基當日只係一個小朋友嘅佢喊得好犀利，坐响太和殿寶座嘅接受百官朝拜時，佢只係覺得凍，好快就失去耐性。當時單膝跪响旁邊嘅爸爸兼攝政王載灃叫溥儀咪亂郁，點知溥儀不斷掙扎，喊曬口咁話要返屋企，跟手載灃氹佢「咪喊，快完了，快完了」。呢句無心嘅說話，搞到文武百官竊竊私語。而最重要係咩？載灃真係開口中。

清朝其後於1911年被推翻，第二年頒布嘅《退位詔書》，代表溥儀正式同皇位講再見。去到1917年張勳復辟，溥儀再次做「短命皇帝」，在位十日多就打回原形，之後仲被趕出紫禁城。三十年代，溥儀於日本扶植之下，成為傀儡政權偽滿洲國嘅康德皇帝，戰後淪為戰犯，到遠東國際軍事法庭出庭作供。

一朝天子，亦係一介平民，如果佢並非清末出生，如果慈禧當年唔係揀佢，如果佢早啲離開紫禁城接觸外界，如果當年並無張勳，未知溥儀嘅人生，會唔會有翻天覆地嘅改變？榮辱辛酸，是是非非，一切都隨住溥儀離世，淹沒於塵土之中。

原圖嚟自網絡。