唔知大家有無睇過80年代由藝人梁家輝、劉曉慶主演嘅《火燒圓明園》？24歲嘅梁家輝仲憑住呢套戲奪得第三屆香港電影金像獎最佳男主角，成為金像獎史上最後生嘅影帝。講起呢套戲就巴閉囉，由香港導演李翰祥主導、澳門賭王投資，唔單止洗咗60幾萬元搭咗一座仿真圓明園去燒，仲請咗多位清史專家為劇本把關。不過電影始終都係電影，同真實嘅歷史點都會有差別。

究竟英法聯軍當初係因為咩原因，於10月火燒圓明園？一直以來有多種講法，但值得一提嘅係，當年參與搶掠圓明園珍寶嘅唔止英法聯軍，清朝民眾都有份。根據中國第一歷史檔案館編印嘅《圓明園》等資料，當英法聯軍入京掠奪圓明園嘅時候，居住喺圓明園附近、海淀一帶嘅民眾亦趁機打劫，連日去圓明園「淘寶」。等到後嚟局勢平息之後，朝廷仲喺當地民眾手中收繳返大量文物珍寶。

晚清報人汪康年所著嘅《記英法聯軍焚劫圓明園事》亦有提到呢件事，「聯軍之所以下焚毀圓明園的命令，一個主要的原因就是為了驅逐不斷湧來參與搶劫的華人。」更有野史話，英法聯軍火燒圓明園，唔少得清朝漢奸帶路。究竟呢個係咪火燒圓明園嘅真相？真係有待專家好好考究一番。

圖為火燒圓明園畫像，原圖嚟自網絡。