唔少女性鍾意珠寶首飾，蔣介石太太宋美齡都唔例外，佢生前非常鍾意翡翠，喺1997年舉行100歲壽宴嘅時候，就曾經戴住全套翡翠首飾出場，包括翡翠耳環、珠鏈、手鐲同戒指，襯埋佢套黑色旗袍，顯得雍容華貴、儀態萬千，非常搶鏡。據講宋美齡手上嘅翡翠手鐲，係由「上海教父」杜月笙嘅太太相贈。

話說喺30年代中期，北京嘅翡翠大王鐵寶定得到一塊翡翠，顏色非常靚，但有啲小瑕疵，於是佢就搵工匠將呢嚿翡翠雕琢成麻花手鐲，掩瑕顯翠。鐵寶定當時以4萬元高價，將呢隻手鐲賣俾杜月笙，成為杜夫人嘅首飾。後來有次蔣杜兩家會面，宋美齡見到杜夫人戴住呢隻靚手鐲，就希望杜夫人除出嚟睇睇，點知越睇越對隻鐲愛不釋手。

挑通眉頭額嘅杜月笙見到呢個情況，就話自己老婆「隻手鐲明明係送俾蔣夫人，你仲咩自己戴住而唔搵個盒裝好？」老公出到聲，杜夫人唯有割愛。據講當時宋美齡無收到隻手鐲，係杜月笙後嚟搵人送到蔣家，等宋美齡得到呢件心頭好。

圖為宋美齡100歲壽宴佩戴翡翠首飾，取自網絡。