之前有美國官員提到中美貿易戰時，以1980年代總統列根時期對蘇聯嘅冷戰作為比喻，形容係場曠日持久嘅較量。講開冷戰，唔少史友都好熟悉，佢係繼第一同第二次世界大戰之後，另一個西史必讀範疇。冷戰係指二戰之後，以美國、英國為首嘅西方資本陣營，同以蘇聯為首嘅共產主義陣營之間近半世紀嘅對抗，當中涉及政治、軍事同經濟嘅角力。雙方陣營未曾直接交戰，但就透過軍事結盟、對第三國支援，以及軍備競賽展開非直接對抗，當中比較重大嘅衝突事件包括韓戰、第二次中東戰爭、古巴飛彈危機、越南戰爭、蘇聯-阿富汗戰爭等等。隨住蘇聯响1991年解體，冷戰先至結束。

英國前首相邱吉爾1946年喺美國密蘇里州發表咗場題為〈和平砥柱〉嘅世紀演說，形容當時歐洲大陸已經出現「鐵幕」（Iron Curtain），「呢個鐵幕背後座落喺所有中歐、東歐古老國家嘅首都──華沙、柏林、布拉格、維也納、布達佩斯、貝爾格勒、布加勒斯特同索菲亞。呢啲著名都市和周圍嘅人口全都位於蘇聯勢力範圍之內，不但落入蘇聯影響之下，而且越來越強烈地受莫斯科所控制」。邱吉爾呼籲英美要結成同盟，阻止蘇聯擴張。演說之後無幾耐，北大西洋公約組織（NATO）正式成立，自此世界分為「鐵幕內」同「鐵幕外」兩個陣營，而呢場世紀演說亦稱之為「鐵幕演說」。

曾經有國際政治觀察家參照美蘇冷戰歷史，歸納出三大新冷戰嘅條件，包括政治及意識形態對抗；經濟分隔；軍事對峙及軍備競賽。而美國現任總統特朗普自2017年上任之後，就鋪路向中國發動貿易戰，又曾經公開宣示反對共產主義，又派軍艦到南海航行等，新冷戰到底有無出現？相信大家心中有數。

原圖取自網絡。