阿史今日去咗一新美術館參觀名為《文武傳奇：明清瓷上丹青》嘅展覽，裡面展出超過40件明末清初嘅瓷器，最特別嘅地方係呢啲瓷器上面畫咗唔同嘅小說同民間故事，非常有趣。據說，以前啲平民老百姓就算有錢都未必睇到大戲，於是家境一般嘅會買啲戲劇題材嘅年畫返去貼，但因為年畫容易爛，於是比較富有嘅人就會買啲畫上唔同劇目嘅瓷器嚟收藏。今次展出嘅瓷器，比較為人熟悉嘅團題材包括蕭河月下追韓信、同力士脫靴有關嘅「李白醉草嚇蠻書」，以及關羽義釋曹操、三顧草廬、空城計等《三國演義》故事。當中阿史比較深刻嘅，係一個有蓋嘅青花罐，由邊位歷史人物做主角？之唔係肚腩大到咩咁嘅安祿山。

嗰個描繪唐朝節度使安祿山嘅青花罐，畫出安祿山响范陽到洛陽嘅途中接受胡族人跳舞同獻酒，祝賀佢自立為帝。瓷罐上嘅安祿山身形肥胖，同《舊唐書》記載佢晚年「腹垂過膝，重三百三十斤」非常一致。資料仲提到，話安祿山雙眼低垂，好似有眼疾咁款，應該係患糖尿病嘅症狀。

除此之外，「鍾馗嫁妹」呢個瓷器亦相當特別，使用立體雕瓷技法刻劃人物嘅動態同表情，技巧非常高超。「鍾馗嫁妹」呢個故事係講述鍾馗因為外表而被皇帝免去狀元，一怒之下撞落石階而死，同佢一齊去考試、曾經饋贈銀兩幫助鍾馗嘅杜平為鍾馗隆重安葬。鍾馗成為鬼王之後，為咗報恩，就還陽將個妹嫁俾杜平報答佢。

順帶一提，個展覽做到明年2月初，想去嘅史友記得安排時間喇~