喺1959年9月，內地政府喺黑龍江省大慶市發現咗大慶油田，喺內地最困難嘅時候，提供咗超過一半嘅原油產量，支撐住內地工業嘅運行。今年係大慶油田發現60週年，累計已經生產咗接近24億噸原油，當年有「鐵人」之稱嘅王進喜，喺工具缺乏嘅情況下，帶領鑽井團隊就為大慶油田付出過唔少汗水。

話說喺1959年發現大慶油田之後，王進喜就喺1960年3月率領鑽井隊坐火車去到現場鑽井，一落火車佢就問鑽機到未、井位喺邊同鑽井紀錄幾多。鑽井機到咗之後，喺無吊車同拖拉機嘅情況下，王進喜帶領隊員，用「人拉肩扛」嘅方式將鑽機卸下，運送到井場。王進喜同佢嘅隊員用4日時間，就豎起40米高嘅井架，又用人力取水50幾噸，確保按時開鑽，佢哋用咗5日多就打完一口1200米嘅井。

過咗幾日，鑽井隊就轉去第二口井繼續工作，期間王進喜整傷咗右腳，佢仍然堅持工作。喺第二口井鑽到700米深嘅時候，因為地層壓力太大，發生井噴，但當時無壓井用嘅重晶石粉，於是王進喜就果斷決定用水泥代替，喺無攪拌機嘅情況下，倒入水泥之後攪極都唔開，王進喜就奮不顧身跳落去，用自己身體攪拌，最終克服咗井噴嘅問題。當時個房東趙大娘眼見王進喜日做夜做，又唔返嚟食飯，就形容王進喜好似「鐵人」一樣，自此呢個稱號就響遍全國。

圖為王進喜率領團隊喺井架工作。