睇過明朝古裝劇嘅觀眾，對錦衣衛、東廠呢類明朝建立、具有特殊職務嘅職位同機構肯定唔會陌生。其中，有明朝「第一錦衣衛」之稱嘅陸炳，係成個明朝唯一一個兼得三公（太師、太傅、太保）、三孤（少師、少傅、少保）頭銜嘅大臣。唔講唔知，陸炳嘅媽媽做過嘉靖帝朱厚熜嘅奶媽，令佢贏在起跑線。

陸炳自細就因為媽媽嘅關係，入宮結識咗嘉靖帝，更曾經對皇帝有救命之恩，所以官運可謂平步青雲。回顧陸炳嘅一生，可謂有彈有讚，佢大權在握嗰時曾聚斂家財，向《明史》六大奸臣之一嘅嚴嵩一派靠攏。但陸炳亦唔妥嚴嵩手下仇鸞，於是佢表面同仇鸞扮friend，背地裡就搜集仇鸞罪證，一舉推翻仇鸞勢力。除此以外，陸炳好尊重士大夫，當朱厚熜長期服食丹藥而變得脾氣暴躁、隨意處罰大臣嘅時候，都係陸炳從中周旋先救返大臣性命，頗受大臣稱頌。

圖為陸炳畫像，原圖嚟自網絡。