平時我哋講嘅「黑仔」、「當黑」、「唔好彩」，書面語都叫「倒霉」，點解黑仔叫倒霉？咁就要由以前考八股文嘅科舉制度講起。

明朝嘅科舉制度超難，要高中唔單止本身要有才，屋企都要有財嚟疏通，仲要識得考場上嘅「規矩」，高中真係唔易。根據清朝顧公燮《消夏閑記摘抄》所載，參加科舉嘅考生會喺屋企門口插支旗，呢支旗就叫做「楣」，中咗就一直擺喺度，假如唔中就靜靜雞收埋，呢個行為就叫做「倒楣」。倒楣嘅本意亦慢慢由無得高中，引申到去日常生活，變成事事不順、唔如意嘅意思。

所以，「倒霉」最初應該寫做「倒楣」先啱，不過，可能「霉」字有變壞、變黑嘅意思，之後先漸漸寫成宜家約定俗成嘅「倒霉」。

圖為《賭俠2002》劇照，原圖嚟自網絡。