喺1860年10月,英法聯軍攻入北京,火燒圓明園,又喺安定門等多處架設大炮,全面控制北京城,清廷被迫滿足英法兩國嘅所有要求。响159年前嘅今日,清朝欽差大臣、恭親王奕訢同英國駐華全權專使額爾金簽訂《北京條約》,內容包括將九龍半島南端、而家界限街以南一帶同昂船洲,割讓俾英國。

其實早喺同年3月,英軍就已經強行佔領尖沙咀一帶,之後英國駐廣州代理領事巴夏禮以九龍半島處於混亂狀態,損害英國利益為由,要求兩廣總督勞崇光將九龍半島租借俾英國。當時廣州已經被英法聯軍佔領,勞崇光被迫同意將九龍半島界限街以南嘅土地,以及昂船洲租借俾英國。後來英國外交大臣羅素收到呢個消息之後,就落order叫額爾金「更進一步」,爭取清廷完全割讓九龍半島。

原圖嚟自網絡。