喺2003年10月24日，蔣介石夫人宋美齡喺美國紐約逝世，享年106歲。據報，當年有部分蔣家家屬希望可以將宋美齡遺體運返台灣，同蔣介石合葬，不過但最後決定遵從宋美齡遺願安葬喺紐約芬克里夫墓園。多年嚟都有唔少人猜測點解宋美齡過身後唔同蔣介石合葬，情況到底係點？

回顧歷史，宋美齡嘅人生跨越3個世紀，佢於1927年不顧家人反對，嫁俾蔣介石，從此成為唔少世界大事嘅參與者。1936年蔣介石喺西安事變中被脅持，宋美齡親自去西安同「少帥」張學良交涉，最終蔣介石獲釋，促成國共合作抗日。張學良曾經講過，西安事變之後，蔣介石曾經想殺死佢，但喺宋美齡調停之下，先可以保住性命。

二戰期間，宋美齡又去到美國爭取支持，令中國得到軍備同財政上嘅援助，戰後亦陪同蔣介石出訪，做蔣介石嘅即時傳譯，同西方領袖溝通，爭取中國權益。响1949年國民黨喺內戰中潰敗，宋美齡跟隨蔣介石去到台灣，1975年蔣介石病逝之後，宋美齡先移居美國。

宋美齡喺2003年10月逝世之後，台海兩岸政要紛紛表示哀悼，包括當時嘅台灣總統陳水扁、副總統呂秀蓮、國民黨主席連戰、親民黨主席宋楚瑜；大陸方面，全國政協主席賈慶林亦有向宋家親屬發唁電。至於點解無同蔣介石合葬，其中一個講法就係話，宋美齡認為蔣家後人會將蔣介石同髮妻毛福梅合葬，作為後妻嘅佢唔希望屈尊喺毛福梅隔離，所以拒絕合葬。另一個講法就話，宋美齡其實係想葬於上海嘅宋家墓園，但因為政治問題，改於紐約落葬。

原圖取自網絡。