前日同大家講完戰鬥英雄李延年，今日同大家講多個同名同姓嘅李延年，不過佢就出生喺漢代，係漢武帝劉徹妃嬪李夫人嘅哥哥。李延年係史上著名樂師，嗰首「一顧傾人城，再顧傾人國」就係出自佢手筆，佢仲靠呢首歌成功令妹妹李夫人入宮。

李延年本嚟係民間藝人，出生於音樂世家，佢啲兄弟姐妹都擅長音律，佢自己更加係說唱歌舞、吹拉彈奏樣樣皆精。不過人無完人，李延年後生嗰陣因為犯法被處腐刑，初入宮時只係一個負責養狗嘅太監，後嚟被發現有音樂天賦，先至成為宮廷樂師。

有一次，漢武帝同平陽公主召李延年奏樂，李延年乘勢演唱咗一首傳頌千古嘅樂曲：「北方有佳人，絕世而獨立，一顧傾人城，再顧傾人國。寧不知傾城與傾國，佳人難再得！」一首歌就聽到漢武帝感概萬千，話世間邊有咁嘅佳人！平陽公主就話俾漢武帝知，其實歌入面個佳人就係李延年嘅妹妹。漢武帝即刻傳見李夫人，果然驚為天人，帶咗回宮，非常寵愛，連帶李氏一家亦升官進爵。不過，李夫人紅顏薄命，佢逝世後漢武帝悲痛萬分，以皇后之禮葬李夫人。

原圖嚟自網絡。