有「愛國商人」之稱嘅霍英東2006年10月28日响北京協和醫院病逝，終年83歲。多年嚟霍英東為中國發展作出唔少貢獻，喺新中國成立初年，當時西方國家對中國實施禁運，霍英東就喺香港組織龐大船隊，運送大量物資，支持抗美援朝。上世紀70年代，中國大陸實施改革開放，當時唔少外商都對此持觀望態度，但霍英東等一批港商就率先返內地投資。霍英東1979年先後投資興建中山溫泉賓館同廣州白天鵝賓館，分別成為國內首間合資賓館，以及首間五星級酒店。上世紀80年代，霍英東又撥出10億港元成立「霍英東基金會」，以捐獻同非牟利投資形式，支持內地教育、醫療、文化等多個領域嘅發展，「大慈善家」之名不逕而走。但唔講唔知，原來霍英東早年曾經過住相當困苦嘅生活。

霍英東1923年生於香港一個水上人家，7歲嗰年，霍英東爸爸就因病去世，而霍英東兩位哥哥又喺出海嘅時候遇難，霍英東媽媽就一個人撐起成頭家，照顧霍英東同佢一個姐姐、一個妹妹。霍媽媽供養霍英東讀書到高中畢業，之後二戰爆發、日軍佔領香港，霍家一艘賴以為生嘅小船被日軍徵用，霍家就唯有擺檔變賣家中衣物、雜物維持生計。香港淪陷期間，霍英東曾經响輪船上做過鏟煤，又做過苦力，後來霍媽媽唔忍心見到霍英東咁辛苦，就用晒積蓄開咗間雜貨店俾霍英東打理，喺霍英東辛苦經營之下，生意越做越好，到咗二戰結束，霍英東收到消息話拍賣日軍遺留落嘅大批戰爭物資同沉船，佢就趕到去拍賣現場，買走只需要簡單修理嘅小艇、舢板同機器，迅速轉賣賺取第一桶金。

之後韓戰爆發，西方國家對中國實施禁運，霍英東睇準時機，冒住被港英政府緝私嘅風險從事海上運輸，將橡膠、輪胎、汽油、油料等等物資運去內地，而佢嘅運輸公司亦得到多間商行嘅信任。霍英東呢個海上運輸生意一做就做咗三年，期間賺到唔少錢，直至抗美援朝結束，佢就開始發展香港房地產業務，興建住宅、寫字樓、商場等等，逐漸建立一個龐大嘅商業王國。

原圖取自網絡。