最近幾個月因為社會運動持續,令的士行業嘅營業額大減。如果大家有印象,其實類似情況喺2003年沙士爆發期間亦都出現過,由於當時的士行業嘅生意慘淡、難以維生,有司機更一時諗唔開而尋死。

當時有位張姓的士司機,就係苦主之一。佢平均每日只係得116蚊收入,而喺最艱難時期,扣除車租等開支,每日更只凈賺得30蚊。有見及此,車主體諒佢嘅難處,主動減車租,更將當初嘅3000蚊按金退返俾張司機,以幫佢度過難關。但張司機始終都敵唔過生活壓力,最後响的士內燒炭自殺。另一位當時供緊的士嘅黃姓司機,亦都因沙士爆發、影響生計,而令到生活舉步維艱,佢經常抱怨揸車「搵唔到食」。最終,佢更加因供車壓力沉重而自尋短見,同樣選擇咗喺的士度燒炭自盡。

除咗的士司機外,沙士嘅影響仲蔓延到好多唔同嘅行業,當其時,因不堪收入減少、失業、負資產等生活壓力而選擇輕生嘅悲慘故事時有發生,實在令人唏噓。

原圖嚟自網絡。