位於香港仔深灣嘅珍寶海鮮舫，可以話係南區一個著名景點，但喺佢70年代初興建期間，就曾經發生過四級火，造成34人死亡、42人受傷。大火導致珍寶海鮮舫嚴重焚毀，令老闆王老吉損失慘重，後來賭王何鴻燊同新世界發展創辦人鄭裕彤，由王老吉手上買入珍寶海鮮舫業權，並投資3000萬重建，設計仿照中國宮廷，據聞單單係中式手工藝飾物同壁畫就使咗600萬。

話說响上世紀60年代尾，本身係太白海鮮舫老闆嘅王老吉希望建造一艘更大嘅海鮮舫，於是就投資1400萬元，由中華造船廠建造高4層、長250呎、闊30呎嘅珍寶海鮮舫。工程由1970年9月開始動工，原本計劃响1971年11月開幕，但點知响1971年10月30日，當時船身已經建造完成，工人進行緊裝修工程期間，燒焊嘅時候唔小心燒著咗裝修物料，火勢迅速蔓延，成艘海鮮舫陷入火海，甚至波及泊喺附近嘅舢舨同漁船，最終導致34人死亡、42人受傷。經歷此劫，珍寶海鮮舫被嚴重焚毀，王老吉無力重建，於是就將海鮮舫業權賣咗俾何鴻燊同鄭裕彤，佢哋投資3000萬重建新船，响1976年10月先正式營運。

喺80年代，珍寶海鮮舫成功收購太白海鮮舫同海角皇宮，結束競爭局面。2003年，珍寶海鮮舫同太白海鮮舫經過翻新之後，就合稱為「珍寶王國」喇。喺電影《食神》入面，周星馳同谷德昭比試廚藝呢一幕就係响太白海鮮舫拍㗎喇。

圖為珍寶海鮮舫，取自網絡。