大家近排可能成日聽到有人聲稱:不割席、不篤灰。「割席」大家就聽得多,講嘅係三國時期嘅名士管寧透過割開一齊坐嗰塊席,藉此嚟表達與並非「志同道合」者絕交嘅故事。但「篤灰」又係點嚟嘅呢?「篤灰」同篤背脊、金手指意思相似,都係解告密、指證同夥。其實「篤灰」正寫係㧻魁,「㧻」解作擊也,推也;而「魁」係指首領。成個詞解作指出、攻擊罪魁禍首。

至於「㧻魁」變成「篤灰」,好可能係源自以前黑社會運毒嘅一個講法。黑社會叫白粉做「灰」,佢哋會用錢去引誘青少年幫手運毒,但青少年只係一個幌子,黑社會人士身上攜帶嘅毒品先係重點。佢哋往往會同青少年一齊帶毒入境,然後向海關「篤」出青少年運毒。當海關嘅注意力放喺搜查青少年嗰陣,帶住大量毒品嘅黑社會就可以乘機成功入境,呢個行為就係宜家講嘅「篤灰」喇。

原圖嚟自網絡。