噚日同大家簡單介紹咗一代愛國華僑領袖陳嘉庚，今日再同大家講多少少佢嘅事蹟。出生於福建嘅陳嘉庚少年時跟住父親去新加坡經商。後嚟父親嘅企業破產，陳嘉庚就自己創業，以種植、加工菠蘿、橡膠起家同幫父親償還債務，漸漸喺華僑社會建立聲譽。陳嘉庚喺華僑社會嘅影響力，亦都為佢日後團結海外華人籌款抗日救國奠定基礎。

1910年，陳嘉庚加入中國同盟會；翌年辛亥革命爆發，佢又喺物資上作出支援。及至滿清政權被推翻後，陳嘉庚決心回國興學。尤其當佢目睹好多小朋友、青少年終日遊手好閒甚至沾染賭博等惡習之後，就更加堅定咗要以教育興國嘅信念，於是佢陸續籌辦集美小學、廈門大學等教育機構。

1928年嘅濟南慘案發生之後，陳嘉庚成立「馬來亞新加坡華僑籌賑祖國傷兵難民大會委員會」，並聯絡南洋各地華僑代表喺新加坡成立「南洋華僑籌賑祖國難民總會」。佢主動帶頭捐款，為前綫戰士捐獻寒衣、車等物資，仲喺新加坡、重慶投資設立製藥廠，直接為前綫供應藥物。

1961年8月，陳嘉庚因全身機能衰竭，喺北京病逝，終年88歲。當時北京各界都有悼念陳嘉庚嘅大會，時任總理周恩來更為佢主持咗新中國成立以嚟規格最高嘅公祭。今年係新中國成立70周年，官方舉辦「最美奮鬥者」評選活動，陳嘉庚成為獲獎者之一，以表彰佢為新中國建設所作出嘅不凡貢獻。