唔知大家有無發覺，身邊總有一啲身材向橫發展嘅人，會被人叫做「肥仔、肥妹」？原嚟唔單止現代，喺古代，生得豐滿一樣會被標籤，洪熙帝朱高熾就因為體態比常人豐滿，搞到佢成日被人監視，更因為肥而差啲連皇帝都無得做。

朱高熾係明成祖朱棣同徐皇后嘅長子，由於有小小癡肥，行步路都要人扶，更加咪話同朱棣上陣殺敵喇。同朱高熾相比，次子朱高煦陪住朱棣征戰沙場多年，更多次喺危難之中救咗朱棣，所以朱棣更加偏愛朱高煦。因此，就算朱高熾被冊封為太子，朱棣都唔係好信佢，經常派親信去監視朱高熾。

除咗有啲肥之外，朱高熾老實仁厚、孝順，又真係無做失德嘢，所以朱棣最終都取消咗改立太子嘅念頭。亦有講法話，因為朱棣偏愛朱高熾嗰仔朱瞻基，先立朱高熾為太子，好等之後朱瞻基可以繼位。

圖為朱高熾畫像，原圖嚟自網絡。