阿史放假嗰陣,最鍾意去冰室歎返個菠蘿油,再加多杯奶茶,邊歎邊睇書真係好寫意。冰室係唔少香港人嘅集體回憶,雖然宜家唔少茶餐廳都叫「冰室」,搞到好多人都以為兩者係同一樣嘢,但其實冰室以前只係賣一啲甜品、輕食,價格亦比較貴,唔係個個都消費得起。

喺上世紀40、50年代,受英國人鍾意歎下午茶影響,香港開始興起只賣輕食、甜品、飲料嘅場所,即係冰室,當時係比較奢侈嘅消費場所。而冰室嘅裝修亦好講究,燈光偏暗,牆壁會掛啲手繪海報,兩邊又有壁燈襯托,就算係裝食物、嘢飲嘅器具都較精緻,非常有情調,最啱約人喺度傾密偈。去到70、80年代,有能力喺冰室消費嘅人多咗,為咗迎合客人口味,冰室開始加入粥、粉、麵、飯等多種比較飽肚嘅食物,經營模式同宜家嘅茶餐廳相似。

 不過,以前嘅冰室同茶餐廳就算賣嘅嘢相似,但都有個最大嘅分別,就係佢哋持有嘅牌照並不相同。冰室主要以麵包、嘢飲等輕食為主,係「細牌」,即係等於宜家嘅小食食肆牌照。而茶餐廳好多時要以明火煮食,例如炒個牛河、煎塊扒咁,屬於「大牌」,即係普通食肆牌照。

原圖嚟自網絡。