上個禮拜同大家講咗明朝洪熙帝因為癡肥，搞到差啲做唔成皇帝，今個禮拜就同大家講吓佢個仔、明成祖朱棣個孫宣德帝朱瞻基。朱瞻基有個愛好，就係熱衷鬥蟋蟀，蟋蟀又叫促織，所以佢又有「促織天子」之稱。

朱瞻基鍾意鬥蟋蟀，於是各地官員都諗盡辦法上貢驍勇善戰嘅蟋蟀，討佢歡心，一時間令蟋蟀喺民間嘅身價大漲。不過，可以成功進貢打得嘅蟋蟀對官員嚟講固然值得開心，但如果一個唔覺意俾進貢嘅蟋蟀逃走咁就大件事喇。根據《明朝小史》記載，有一個地方小官用一匹上等馬換咗隻靚蟋蟀返嚟準備上貢，點知佢老婆好奇，掀開個蓋偷睇隻蟋蟀，令隻蟋蟀趁機跳走。小官老婆怕被責罰，竟然上吊自殺，小官無咗隻蟋蟀交唔到差，亦跟住自殺，可見當時蟋蟀嘅地位之高、影響之大。

圖為朱瞻基畫像同鬥蟋蟀，原圖嚟自網絡。