宜家嘅恒生銀行,係由1965年先開始成為滙豐集團旗下嘅主要成員,原來對恒生創辦人之一嘅何添嚟講,將恒生嘅股權賣俾滙豐,係佢一生嘅憾事。

1933年,何添同拍檔何善衡等創辦人合資喺上環永樂街70號創辦恒生銀號,由何添擔任掌櫃。之後香港淪陷,何添等人帶住恒生嘅18個職員避到澳門,並以永華銀號嘅名義喺澳門經營。二戰結束後,何添回港繼續經營恒生,適逢港府禁止黃金入口,恒生憑住之前經營嘅黃金買賣生意所積存落嚟嘅大量黃金賺咗一大筆。

好景不常,1965年,受明德銀號同廣東信託銀行先後出現擠提所累,恒生亦被波及,去恒生提款嘅人絡繹不斷,出現嚴重擠提。何添雖然得到唔少老友出手相助,但恒生都係過唔到呢關,最終要以5100萬將五成一恒生股權賣俾滙豐嚟平息事件。

圖為恒生銀號、何添,原圖嚟自網絡。