《殭屍先生》係經典嘅港產殭屍片,戲入面嘅捉鬼三師徒林正英、錢小豪同許冠英性格各有特色,加埋一齊又好笑又夾,令人印象深刻,三人更被視為黃金組合。可惜繼林正英喺1997年今日過身之後,許冠英亦喺2011年今日過身,呢個師徒黃金組合從此成為絕響。

講起許冠英,好多人可能只係記得佢係歌神許冠傑嘅哥哥,但許冠英嘅努力同成就唔會差得過細佬。許冠英由邵氏演員訓練班畢業之後,已經參演咗多部電影,其後又同哥哥許冠文合作《半斤八両》、《賣身契》、《摩登保鑣》等喜劇而大受歡迎。佢之後更喺電影《發錢寒》擔大旗出演,該電影仲一度成為港產片票房冠軍。最能夠肯定許冠英演技嘅,係《殭屍先生》嘅文才一角,並獲得當年香港電影金像獎最佳男配角提名。

許冠英同許冠傑感情深厚,經常一齊jam歌,亦擔任過許冠傑演唱會嘉賓。佢仲為細佬作過唔少名曲,就好似〈無情夜冷風〉、〈夜雨聲〉等。就算無細佬傍住,許冠英嘅歌唱事業一樣發展得唔錯,電影《發錢寒》嘅同名專輯係佢發行嘅第一張粵語專輯,當年係最暢銷唱片。2006年,許冠英仲喺理工大學開過「許冠英斤兩十足演唱會」添。

圖為《殭屍先生》劇照,原圖嚟自網絡。