過幾日,國家主席習近平就會去巴西出席金磚國家領導人會晤,阿史今日介紹吓金磚國家嘅由來啦。話說早喺2001年,美國高盛首席經濟師奧尼爾(Jim O'Neill)就首次提出金磚四國(BRIC)概念,「BRIC」呢個名由巴西(Brazil)、俄羅斯(Russia)、印度(India)同中國(China)四國英文名第一個字母組成,由於「BRIC」同磚塊英文「brick」相似,就稱之為「金磚四國」喇。

2006年,俄羅斯總統普京提議之下,金磚四國外交部長喺紐約聯合國大會期間進行首次會晤。之後幾年金磚四國政府高層進行過多次會議,促成2009年6月金磚四國領導人响俄羅斯葉卡捷琳堡舉行首次正式峰會,又發表聯合聲明,表明會以循序漸進、積極務實、開放透明嘅方式推動四國對話同合作。

到咗2010年,金磚四國一致同意接納南非(South Africa)加入,成為合作機制一部分,自此「金磚四國」就變成「金磚五國」喇(BRICS)。

除咗經濟,金磚五國仲會討論到地區問題、解決衝突、毒品販運、通信技術、自由貿易同知識產權等等議題。不過亦有分析指,中國嘅經濟實力遠超其他金磚國家,2013年五國之間嘅貿易中國就佔咗八成半,而中國亦係其餘四國嘅三大出口目的地之一,認為中國喺金磚五國呢個平台上具有領導地位。

圖片為2017年金磚國家領導人會議,取自網絡。