做老細嘅，梗係唔鍾意員工「吞pop」喇，不過呢，打工仔做嘢攰得滯時，鬆吓、抖下再繼續工作，可能反而更有效率喎！話時話，咁究竟「吞pop」呢個詞係點嚟嘅呢？

其實「吞pop」係「吞泡」嘅諧音，講緊嘅係舊時啲人食鴉片嘅情景。以前吸鴉片要用到煙槍、煙燈等工具，將鴉片膏加熱先吸食到。如果咁啱煙癮起又無工具喺身嘅話，亦會有人將啲鴉片膏搓成丸子狀隨身攜帶，用水、茶嚟送服，舒緩煙癮。呢啲鴉片丸子就叫做「煙泡」，所以食鴉片又稱之為「吞泡」。由於吞泡需時，要暫停手上嘅工作，之後就引申為暫時離開工作崗位稍事休息嘅意思。

原圖嚟自網絡。