阿史有個朋友前排去咗內蒙古玩，佢話見到有人搶親，新郎要帶住兄弟團喺一大班女家親友圈裡面「搶」個新娘出嚟，覺得幾㜺鬼。呢類型嘅搶婚其實算係小兒科，喺以前嘅蒙古人通婚習俗裡面，搶人哋老婆嘅「搶婚」好常見，就連成吉思汗嘅母親都係佢爸爸搶返嚟嘅。
成吉思汗嘅母親訶額侖，有一日同新婚丈夫騎馬經過，咁啱被成吉思汗嘅父親速該見到。速該見訶額侖生得靚，即刻帶埋班兄弟追上去，結果個新郎細膽，嚇到走咗，訶額侖就自然成為速該嘅新娘喇。
搶婚又叫做搶劫婚、掠奪婚，係自原始社會流傳落嚟嘅婚俗習慣。以前嘅蒙古人好流行搶婚，男人見到靚女，無論對方係咪已婚，都會強搶過嚟，成功搶到嘅話就可以炫耀自己武藝高超，係一種榮耀嚟㗎，更加唔會受譴責。如果女仔被人搶親就係對佢個靚樣嘅一種肯定，相反，假如蒙古女仔從來無被人搶過反而會傷心，原因……你哋明嘅。
圖為蒙古族婚禮場面，原圖嚟自網絡。