過去週末，英國舉行咗國殤紀念日活動，悼念响一戰同二戰中陣亡嘅英軍同盟軍將士，當地民眾亦會响呢日佩戴虞美人花悼念。國殤紀念日訂喺每年嘅11月11日，紀念第一次世界大戰結束，响1918年11月11日清晨，協約國同德國簽署停戰協定，並且响當日11點停戰。

1919年，英王喬治五世將11月11日訂立國殤紀念日，紀念第一次世界大戰結束，又為戰爭死難者默哀，後來官方將紀念儀式改到最接近嘅星期日（即係11月第2個星期日）舉行，並一直沿襲至今。

而佩戴虞美人花嘅傳統係源於一戰期間，加拿大軍醫麥克雷（John McCraw）為戰友主持喪禮之後，寫咗《在法蘭德斯戰場》（In Flanders Fields）呢首詩，提到一戰其中一個戰況最慘烈嘅戰場法蘭德斯，長滿咗虞美人花，而虞美人花嘅紅色亦象徵鮮血嘅顏色，自此啲人就以虞美人花紀念陣亡將士。

到咗1921年一戰結束之後，英國陸軍少校豪森成立工作坊，邀請退伍軍人同家屬參與製作虞美人紙花，再向公眾派發，結果大受歡迎，就開始咗佩戴虞美人花呢個傳統。

原圖取自網絡。