獨在異鄉，無論係求學定做嘢，都會有一段比較艱難嘅日子，《邊城》作者沈從文亦曾經歷過。沈從文後生嗰陣曾經北上求學，但當時窮困潦倒嘅佢因為交唔起學校嘅住宿費，只能租一間又逼又窄又潮濕嘅屋仔住，靠自己微薄嘅稿費過日子，呢間屋仔仲被佢叫做「窄而霉小齋」嚟自嘲。 

正當沈從文窮到燶，就嚟瀕臨絕境嘅時候，佢寫咗封信俾同係作家嘅郁達夫求助。郁達夫收到信之後，決定親眼去睇睇沈從文。嗰日落住大雪，郁達夫見到沈從文喺「窄而霉小齋」裡面凍到震，於是就將自己身上嘅頸巾披喺沈從文身上。

沈從文講起呢件事嘅時候已經70幾，諗起往事佢甚至有啲眼濕濕，佢話當年郁達夫嚟睇佢，拎咗五蚊出嚟同佢一齊去食飯，之後將埋單找返嚟嘅錢都俾晒佢。呢個情景沈從文一世都唔會忘記。嗰陣時嘅五蚊真係唔惹小，夠沈從文食到好幾餐喇。

原圖嚟自網絡。