尋日講起大閘蟹，唔講唔知原來孫中山夫人宋慶齡都好鍾意食，而且鍾情嘅程度，係連佢自己本身有皮膚敏感，都要食定抗敏感藥再去食大閘蟹。除此之外，宋慶齡仲會不時託人由上海運啲大閘蟹去到北京，送俾毛澤東、劉少奇同周恩來等熟悉嘅領導人同好朋友。

另外，聽屋企嘅長輩講，喺文革歲月，老百姓對四人幫恨之入骨，於是到咗1976年10月四人幫倒台後，果年秋季大家都紛紛搶購大閘蟹嚟食，仲要指定食齊「三公一母」，其中嘅諷刺、揶揄之意，相信大家明嘅。據說當時宋慶齡亦唔例外，吩咐工作人員自己都要食「一母三公」大閘蟹，連養女隋永清提醒佢母蟹好食啲，宋慶齡都堅持要食「一母三公」。

原圖取自網絡。