早排講起英國舉行國殤紀念日活動，提到國殤紀念日原本係第一次世界大戰結束嘅日子，有悼念陣亡將士嘅活動，今次就講多啲有關一戰結束嘅歷史。

由1918年9月底開始，德國嘅盟友包括保加利亞、鄂圖曼帝國同埋奧匈帝國先後向協約國投降，而德國就繼續負隅頑抗。但由於不斷傳出德軍戰事失利嘅消息，德國內部逐漸出現矛盾，基爾港水兵拒絕出戰，隨後同年11月更爆發革命浪潮。11月9日，德皇威廉二世宣布退位，並逃到荷蘭。11月11日，德國看守政府代表就同協約國代表，法國元帥福煦喺巴黎北面嘅貢比涅（舊稱：康邊）嘅一節火車車廂中簽訂《康邊停戰協定》，標誌第一次世界大戰正式結束。

原圖取自網絡。