1931年今日,詩人徐志摩乘搭嘅飛機喺濟南附近墜毀,徐志摩亦都喺呢場意外中罹難,結束佢傳奇嘅一生。徐志摩天生聰穎,據說佢1歲嗰陣已經被和尚話係「麒麟再生」,前途無可限量。

徐志摩本名章垿,據傳就喺徐志摩滿1週歲嘅時候,有個叫志恢嘅和尚,自稱可以摸骨算命,佢喺徐志摩嘅頭上摸咗一圈之後話:「此子係麒麟再生,將來必成大器」。因為被「志」恢和尚撫「摩」過,所以有咗「徐志摩」呢個名。

而徐志摩大個之後又真係零舍醒目,唔單止被私塾老師讚佢「初學聰明超儕輩」,更以連續5年第一嘅成績喺中學畢業。再之後,佢寫出〈偶然〉、〈再別康橋〉等經典詩篇,開創咗中國新詩格律化嘅新格局,對中國文學發展有重要貢獻。

原圖嚟自網絡。