每年農曆新年，唔少人都會去年宵花市「行大運」，不過嚟緊新年嘅年宵市場就無咗乾貨攤位，真係失色不少。年宵花市嘅歷史由來已久，最早可以追溯至明朝嘅廣州，廣東話「花」係「發」嘅諧音，寓意財運行通、花開富貴。

香港早期嘅年宵花市，據講係位於太平山山腳嘅擺花街一帶，小販喺新年之前聚集賣花同糖果瓜子等應節商品，當時政府對呢種年宵花市規管寬鬆，只會警告小販唔好阻礙消防救援。到咗二戰期間，日本佔領香港，就再無舉行年宵花市，直至日軍投降之後，香港政府就開始實行小販管理制度，而1950年政府亦開始以發牌形式，向小販提供攤位，經營年宵市場。到咗1960年，年宵市場遷至維園舉行，當時就有乾貨同濕貨攤位，直至1978年先增設快餐攤位。

近年，年宵市場乾貨攤位亦成為唔少年輕人，嘗試搞小生意嘅機會，但今年政府以公眾安全同公共秩序為由，取消嚟緊年宵花市嘅乾貨攤位。

圖片為70年代香港年宵市場，取自網絡。